近期無綫劇集收視認真麻麻，特別係重頭劇《金枝慾孽貳》，收視更慘收19點（約122萬觀眾），就連由無綫契仔李克勤主持嘅《決戰一分鐘》收視都每下愈況，徘徊喺21點（約135萬觀眾）之間。
補鑊讚蔡少芬
克勤前晚喺電視城錄影《決》最後一集，請咗陳慧琳、草蜢、吳雨霏（Kary）同關楚耀做壓軸嘉賓。問到收視唔理想，係唔係美中不足？克勤竟然踩《金枝貳》一腳，口快快咁話：「咁又唔係，點都好過啲劇集！」佢都知講錯嘢醒水補鑊：「我都有睇《金枝貳》，有捧蔡少芬（Ada）場，係要時間慢慢浸，Ada做得好好。」講到無綫劇咁好，但佢無意出手救亡，仲耍手擰頭話：「唔使喇！」記得當年佢同鄭秀文套《浪族闊少爺》都唔錯。
講番個節目，關楚耀代表大家試玩100萬遊戲，可惜失敗。克勤拎Kary同余文樂嘅戀情開玩笑，自爆見到Kary就忍唔住諗起樂仔喺電影《春嬌與志明》嘅對白：「粉紅色嘅褲頭（應係乳頭），可遇不可求。」全場爆笑。
版主：陳基征
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！