電盈（008）主席李澤楷收大信封！話說電盈忠實小股東陳仲翔（Danny）死心不息，噚日喺股東會上再度要求小小超搵股神畢菲特入股，即場送上一個大信封，叫小小超注入才幹、能力同誠意，寄信畀股神感動佢入股，仲估計如果股神落實入股，電盈升十倍都唔係發夢。
小股東料爆升十倍
Danny係電盈忠實小股東，忠實嘅程度，令到小小超點名叫佢提問，Danny亦早有準備，追問小小超有冇聽佢舊年提出嘅建議，搵股神入股。佢自爆係股神旗艦巴郡B股嘅小股東，舊年寫咗封信畀股神，介紹「電盈三寶」，即係電盈、香港電訊（6823）同盈大地產（432），可惜未收到回信。
佢唔死心，希望踢郁小小超，揚言如果小小超打算搵股神入股，電盈翌日升一成；真係寄信出去，升五成；股神落實入股，升十倍都唔係發夢。望住Danny專心聆聽嘅小小超都聽到眨晒眼，笑晒，話多謝Danny咁有「建議性」同「詼諧」嘅提問。
小小超回應話，冇忘記Danny嘅建議，過去兩年，管理層不時同高質素嘅投資者同基金會面，電盈同香港電訊兩隻股嘅表現足以反映，但佢唔講得有冇搵過股神。查實邊個小股東唔想股神入股自己買咗嘅股份吖，傳吓都一成一成咁升啦。
李華華
mailto:[email protected]