回歸前曾經係港台節目《頭條新聞》惡搞對象嘅前港澳辦主任魯平,上月竟然接受《頭條》訪問,仲開腔講政改同佔領中環行動。節目編導陳曉君係功臣之一,諗到搵上海宋慶齡基金會幫手約訪。負責去上海訪問魯平嘅另一編導易詠欣就話,魯平健康非常好,訪問地點要行一條長樓梯,「佢嚟到二話不說就話冇問題,健步如飛行上去」。佢話訪問中魯平仲好有火,尤其講起「千古罪人」肥彭特別肉緊。而魯平臨走時都不忘提醒一句:「你們要全面的報道,不要斷章取義。」
其實唔係人人都冇隔夜仇㗎,《頭條新聞》今次訪問係為回歸而做,原本都約訪另一金句王陳佐洱,點知就被拒絕。