【銅鑼灣】無綫咪神梁政珏舊年年底同潮牌老闆男友Eric Chu分手之後，今年極速搵到另一位真命天子，身邊換咗北海道牧場餐廳老闆何思源，仲周不時見到佢哋好煙韌行街拍拖買三級碟睇。前日下午5點幾，平時出席活動鍾意大晒事業線嘅梁政珏，就算平時行街都毫不吝嗇咁拋胸上陣，但係喺男朋友身邊，佢就收起性感，只係騷咗少少事業線，即時淑女咗好多。
扮鬼臉嘟嘴
梁政珏兩個人去到銅鑼灣時代廣場，喺地面行咗一陣就落咗地庫商場。以為佢哋想拍拖行超市，點知位何思源行咗入花檔揀花，而梁政珏就好甜蜜咁企喺花檔出面等男友買花𠱁自己，仲對住男朋友扮鬼臉、嘟嘴打情罵俏。不過，睇咗5分鐘，何思源都係空手而回，但係梁政珏就冇嬲，依然拖住佢上扶手電梯準備返回地面，其間警覺好高嘅梁政珏終於發現記者嘅鏡頭，仲大方擺出V字手勢，然後同男友耳語一番之後，一上到地面步出商場，兩人為咗擺脫記者，即刻冒住大雨走入人群中消失。
採訪、攝影：徐錦池
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！