謝君豪和蘇玉華同是好戲之人，自然惺惺相惜，兩人16年後重演舞台劇《南海十三郎》，演技更上一層樓的他們期待再爆火花，蘇玉華認為意見越不合越能刺激思維，所以他們綵排時都毫無保留，勇於表達不同意見。
撰文：比華利
謝君豪和蘇玉華同是出色舞台劇演員，兩人多次在台上交流，劇中更先後化身情侶、母子，甚至叔姪，50歲的謝君豪較蘇玉華年長5歲，如何扮母子？她解釋：「喺《我和春天有個約會》裏面，劇情交代我死咗，我哋有同場，但關係的確係母子。」97年他們已演過舞台劇《南海十三郎》，二人劇中是叔姪，事隔16年，本月中他們重演這劇目，兩叔姪得以在舞台重逢。
執到寶
謝君豪和蘇玉華皆認為好戲不厭百回演，二人密鑼緊鼓在觀塘綵排，蘇玉華說：「呢個係杜國威最好嘅劇本，遇上好劇本等於執到寶，呢個劇令我兩眼發光，仆倒去做。」謝君豪97年更憑主演電影版《南海十三郎》，首奪台灣金馬影帝。
兩叔姪打算帶給觀眾甚麼突破？謝君豪說：「諗嚟冇用，只要將過程做到最好，出嚟就會有意想唔到效果，我相信呢十幾年，大家都成長咗，演技有進步，靈感會更加多。」蘇玉華十分認同，她亦說：「我唔認同專登搞啲新嘢就叫好，我習慣係即使重演同一套舞台劇，我每次都會當新戲去演，排戲時唔會copy番，否則好悶，我同對手磨合出嚟就自然有微妙化學作用。」蘇玉華深信與謝君豪至今的修為、合作必爆新火花。
逐晚爆
謝君豪不介意跟拍檔有爭拗，他說：「大家出招好，排死就唔好玩，冇咗新意，呢啲咪係火花。」他笑言希望儲足火藥，留待公演時逐晚爆，蘇玉華說：「有意見最好，越相反越可刺激思維，我冇話一定要堅持，藝術係冇對與錯。」
舞台劇講究演員跟台下觀眾互動，某次意外更叫蘇玉華難忘：「嗰次劇情交代我切糕分畀家人，點知阿爸冇行前接掛住抹地，明明劇情冇呢段，大家對白開始接唔上，原來我見到台上有滲水，情況一發不可收拾。我忍唔住腰斬同觀眾講：『我𠵱家屋企爆咗水渠。』觀眾聽完已笑爆，佢哋其實眼見情況，已好明白。」結果休場15分鐘，之後觀眾仍看得投入。
預料之外，全靠演員執生，謝君豪說：「呢啲畀排出嚟仲好睇，所有嘢要激發演員小宇宙去解決。」
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！