劇情失控嘅無綫劇集《神探高倫布》今晚終於大結局，就算故事係點，對觀眾嚟講都係鬆一口氣，起碼唔使邊睇邊鬧。成套劇唯一有人讚嘅，可能係唐詩詠嘅精神分裂演出，同佢平日做慣乖乖女好大分別，詩詠話：「梅妹可以話係我喺演戲事業一個新轉變，有批評先進步，我繼續試新嘢。」
撰文：何慧斯
我做過好多次乖乖女角色，今次喺金牌監製李添勝操刀嘅無綫劇《神探高倫布》終於大突破，一人分飾兩角，扮完黎耀祥初戀情人梅妹，再做埋梅妹個女「司徒男」，仲有大露背鏡頭。講到呢個精神分裂嘅梅妹，其實背景都幾複雜，一個40幾歲嘅女人，做過舞女又做人情婦，仲捲咗入一宗烹夫案，雖然祥仔用盡方法幫佢甩身，但最後都難逃一死。喺臨死前嘅一刻，梅妹慨嘆話原來幸福一直喺自己手中，但佢唔識得珍惜，𠵱家已經冇資格擁有，跟住安慰祥仔唔好為佢傷心，希望佢搵番佢自己嘅幸福，記住呢個永遠微笑。呢場戲感動到好多人，令人體會愛就係幸福呢個道理。
我真係好愛呢個角色，我同添哥合作過兩次，唔知點解佢可以睇到我一啲嘢，又畀到啲信任我，呢份信任畀到我自己好大信心，變咗我會同自己講，佢都搵得你做，唔係對自己冇信心嘛？所以我冇擔心過。至於外界有批評，乜嘢聲音都要聽，我又冇嚇怕，只係唔開心大家唔明，諗唔到啲反應會咁極端，有批評先有進步。
除咗感情線，都有事業線，只不過以前嘅事業線一向都比較靜態，少咗啲變化嘅機會。呢段時間我都好開心，大家睇我做嘢嗰方面，好似呢個角色係冇唐詩詠嘅影子，拍嗰陣好快投入，感受到梅妹嘅心情，不過如果呢套劇喺幾年前拍，我未必拍到，你又會睇到啲以前睇唔到嘅嘢，我相信觀眾同我哋嘅角度係一樣，要吸收同接納啲嘢，先可以有嘢畀到人睇。有添哥點名力讚，我反而對摸索嘅過程有信心，唔再局限喺表面，等於人係會越嚟越複雜，喺複雜角度去睇簡單嘅事，分分鐘有意想不到嘅效果。
有人問我會唔會繼續試新嘢，我都好想試，呢次對我好似係蛻變，雖然轉變係啱，不過演員好被動，未必成日可以遇到一個可以幫到你向前行嘅劇本，有時可能要兜少少路，所以就算今次拍完，下次叫我返番去拍啲好拿手嘅乖乖女角色，我希望可以喺一啲位度攞個平衡，雖然未必人人接受得晒，但起碼令人覺得我做到啲成績，而唔會覺得我有倒退，所以我好拍開心拍到呢個劇。
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！