【拆局】
特首梁振英及食物衞生局局長高永文想在十一黃金周後撤限奶令，不少政界人士相信是兩人為回應北京不滿的決定，但有官場中人直言撤令表面容易，實際有極大政治風險，因沒有人可以估計撤令後，會否再現水客搶奶粉、供應商是否真的確保奶粉供應充促，「萬一又有奶粉荒，市民要再用限奶令，但北京又唔高興，咁政府就麻煩」。
「以後唔可以再用」
有政界中人直言，雖然高永文稱稍後會做「壓力測試」，確保奶粉供應充足後，才決定是否撤限奶令，但不少建制派中人均指高「唔撤唔得」，「成件事北京好嬲，內地輿論、民意反彈好大，梁振英、高永文同北京解畫話（限奶令）唔係長期政策，即係話一定要撤，只差時間問題」。若十一未再見內地人搶奶粉致缺貨，「睇唔到（梁振英）可以唔撤」。
不過有官場中人直言，若撤令後奶粉商「玩嘢」，「到時又限制供貨，又再有媽媽買唔到奶粉」，梁也未必敢再提限奶令，「再用限奶令一定損害內地人感受，北京一定唔高興，即係以後唔可以再用」。可以說撤又死唔撤又死。
《蘋果》記者