【中環蘭桂坊】松岡李那前晚竟然背住男友林德信同糖妹男友Dominic喺中環蘭桂坊激吻，仲要玩到脷叠脷？其實唔使大驚小怪，呢啲只係葉念琛新戲《媾女不離三兄弟》嘅劇情，佢哋仲NG咗四次，每次都有高潮位，之後仲俾蒙面嘅連詩雅用cream掟面，Dominic即爆粗話：「搞×錯！」松岡亦用半鹹淡廣東話講：「你老母！what the fxxk！」
向糖妹備案
不過鏡頭背後松岡唔止冇嬲，仲笑到咔咔聲，又表現得好專業，雖然每次NG都要重新執執個樣，但佢完全冇詐型。Dominic之前同糖妹傳過分手，佢話有向女友備案：「佢忙到未有時間覆我。」問女友同松岡邊個好咀啲？佢識做咁話：「梗係女友啦！」
連詩雅喺戲中係愛護動物人士，因見過松岡着皮草，於是報復做出激進行為；另外連詩雅最近為新歌《說一句》拍MV，要喺浴缸同睡床幻想同以前男友嘅點滴。
有份演出《媾》嘅莊思敏前晚雖然唔使開工，但就同緋聞男友葉念琛着紅色情侶裝到場，仲獲女王式招待，有工作人員幫佢擔遮。葉念琛踢爆戲中沈震軒非常好艷福，分別同莊思敏、連詩雅有激吻戲，問葉念琛點解俾女友同其他男人咀？佢笑笑口話：「吓？關我乜事，佢哋都咀得好激！」
採訪：卓寶花
攝影：陳志嵐
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！