最近內地藝人范冰冰活躍影壇，另一個「冰冰」亦好唔得閒，早前俾美國娛樂雜誌《Variety》選為本年度亞洲之星嘅李冰冰，噚日就去咗肯雅桑布魯野生動物保護區，不過佢就唔係去拍戲，而係以聯合國環保規劃署大使身份去探訪當地土著。
呼籲愛惜大象
入鄉自然要隨俗，李冰冰一去到嗰度，除咗要戴上五顏六色嘅大頸鏈外，仲要俾當地人喺面上搽上有象徵意義嘅圖案，當堂變咗花面貓。不過俾人畫花靚樣嘅李冰冰唔單止冇唔開心，仲好可愛咁對住鏡頭伸晒脷，似乎好享受！之後李冰冰又笑晒嘴同當地土著一齊跳舞，仲彈到好高，玩得不知幾高興。佢出發前幾日就喺肯尼亞奈洛比嘅聯合國環保規劃署總部嚟咗個即席演講，佢話：「被獵殺大象的數字令人觸目驚心。」仲話大家都有責任愛惜大象喎。
撰文：洪紅克
逢周五隨《蘋果日報》附送嘅時尚美容雜誌《add》雖然早已派完；拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！