人人鍾意股神畢菲特，佢旗下巴郡總部所在地奧馬哈，有兩位居民早排就出咗一本名為《My First Berkshire ABC》嘅字母書，向股神致敬。封面印有卡通版股神，手揸一罐佢最鍾意飲嘅櫻桃可樂，夠晒親切可愛。
賣百幾蚊 售出過千本
書中內容同一般字母書好唔同，呢本書唔會教你A for Apple，B for Boy咁簡單，每個字母所代表嘅英文字都同巴郡業務有關，例如，B for Borsheim's、D for Dairy Queen，分別指巴郡旗下珠寶店同雪糕店。
雖然呢本字母書要成百幾蚊港紙，不過上周六喺巴郡舉行股東大會期間，已經賣出千幾本，可見股神真係有好多粉絲。教細路ABC之餘，等佢哋知道有乜大企業存在，都幾好。