港股四連捷後終斷纜，埋單倒跌32點，唔少人認為大市成交唔夠，挾倉已屆尾聲，唐牛覺得巨無霸新股正在招股，有心人一定會維穩股市，務求吸引更多散戶入飛，締造熱鬧效果。
SDI早前披露，中投月初大手沽出風電股華能新能源（958），由原來6.24%減至3.65%嘅毋須披露水平，涉股75球，難怪該股多次試衝高位皆無功而還。參考同業華電福新（816），多個中資股東如南車集團、明陽風電、國家電網於3月起連環掟貨，股價卻不跌反升，近日更創出新高。點解會咁？其中一個原因肯定係因為龐大沽壓已消除，股價更易舞上。歐盟計劃向中國太陽能面板徵收近七成進口關稅，拖累光伏股捱沽，樂觀相信部份資金會流向其他新能源股，華能新能源首季業績靚爆鏡，發電量大升65%，吸資能力毋庸置疑。昨收2.55元，升0.8%，彭博綜合券商預測，今年PE 16倍，以增長股嚟講絕對合理，一於與中投對着幹，買入博破頂。
唐牛