英超傳奇領隊費格遜正式宣佈榮休，可喜可賀。我乃廿幾年曼迷，基本上同費Sir帶領曼聯同步。費Sir領軍及管理，早已有不少研究，去年佢亦獲邀去哈佛商學院就管理智慧發表演說，由一個成功領隊，蛻變成出色管理人。
人性管理 球員信服
早前我介紹過FT專欄作家Simon Kuper分析費格遜文章，可見他性格中，糅合了傳統、人情及開明，我一直相信費格遜成功與此有關。當大家開盤口猜測接班人，均將愛華頓領隊莫耶斯列為頂頭大熱，除咗佢帶領中型班表現出色外，也有不少人認為因為莫耶斯也是蘇格蘭人。
究竟蘇格蘭人有乜把炮呢？香港人本應對蘇格蘭人並不陌生，世界知名的滙豐銀行，能建立基礎，係得力於蘇格蘭banker。在西方文化史上，蘇格蘭人貢獻不少，尤其是對現代世界的思考，更顯示出蘇格蘭啟蒙文化中，理性、人性、務實一面。
荷姆（Henry Home）思考法律的正義、休謨（David Hume）提倡經驗主義哲學、勞伯森（William Robertson）則探究人類文明的演進。在這些基礎上，他們進而提出「現代」社會建構的理念。
最為人知當然是巿場經濟學開山祖師亞當斯密（Adam Smith）提出現代社會的經濟法則，根據歷史學家研究，十八世紀以來蘇格蘭人創造了一個「講斯文、重人性、開明」的蘇格蘭文化。
費格遜不是學術大師，他是來自藍領家庭，當球員時也冇乜表現，但當上領隊後，他展現了人性管理之技巧。曼迷都知道，沒有法國大帝簡東拿，就冇曼聯步入英超後的輝煌，曼聯黃金一代碧咸、加利仔兄弟、史高斯、傑斯都係跟住大佬簡東拿成長，而簡東拿係性格巨星，因起飛腳踢球迷，被足總重罰停賽八個月，費Sir力撐簡東拿，換取了野馬的忠誠回報，也為費格遜開創了一代皇朝。
C朗與他情同父子，離開曼聯仍互相聯絡，歐聯八強C朗再遇昔日恩師相擁那刻，大家相信球員領隊之間是有真感情。
費Sir不是老好人，一味與人為善，中堅史譚出書爆料即走，星級主將碧咸變成時尚名流後唔聽話，即走。佢亦非次次相人都成功，買入次貨不少。
但費格遜展示出一種當今已買少見少的人性管理。曼聯球員逐個計，可能比唔上曼城甚至車路士，但因為費格遜，令球隊上下充滿爭勝決心，可見他重要性。
費格遜時代終於結束了，但若由蘇格蘭人莫耶斯繼承領隊職位，是一個好選擇，名氣上他比唔上皇馬摩連奴、熱刺波亞斯，但其務實、堅毅、投入，更接近費格遜及曼聯氣質。
添馬男