記得3月初晉佳仲係睇淡，當時只叫大家留意吓冷門嘢，所以推介醫藥股復旦張江（8231）。兩個月後嘅今日，呢隻股反覆升咗一成，表現尚算對辦，噚日收市後公佈今年首季業績，淡季中收入仍勁升1.5倍至4,703萬元人民幣，純利按年升81%至754萬元人民幣，主要因為重鎚投入研發、分銷及市場推廣，呢啲開支對未來開拓收入有幫助，合情合理。
不過始終係股仔，放榜後今日股價點走，仲要睇吓大戶點演繹，如果今日走勢向好嘅話，呢隻股的確值得繼續小注持有。
復旦張江收入增長，幾乎全部來自專醫濕疣嘅藥品艾拉，同埋腫瘤治療藥物里葆多，相信單靠呢兩隻藥，未來增長仍然能夠持續；至於醫治鮮紅班痣嘅海姆泊芬，就已經獲得新藥證書，預計遲啲可以出售，到時可以為收入帶嚟更大增長動力。公司喺噚日季績通告講到，「隨着新產品的不斷上市，預期未來還將持續大幅增長。」似乎呢個大幅增長嘅預測，絕對唔係得個吹字，公司有一定把握，盈利幾時先見頂，可以話完全冇得估。
落注與否睇今日走勢
復旦張江2012年市盈率（PE）成40倍，不過，今年盈利將會繼續爆升，估計會落番去25倍樓下，如果講緊盈利今年幾何級增長，出年照計仍然持續上升，嚟緊仲有新產品推出嘅醫藥股，25倍PE樓下買貨，晉佳唔覺得貴囉。
原來歐洲股神主理嘅富達基金同埋「女股神」劉央，喺今年初已經靜雞雞落注，分別喺1月16日同2月4日，買咗1,400萬同1,780萬股，雖然平均價係1.70元同1.94元，明顯低過現價，但證明間嘢唔係流，大把人爭。不過，富達目前持股已經低於5%，所以實際唔知富達𠵱家揸幾多。
不過，都係嗰句，股仔出完業績，市場點樣演繹，都仲要睇埋今日股價，如果今日升得靚仔當然買得過。呢隻股買賣盤較疏落，同時透明度未至於高，總有些少風險，所以只宜小注。
晉佳
本欄逢周一、三及五刊出