隔牆有耳:<br>狼英催眠 吳得掂醒神睇股 - 李八方

隔牆有耳:
狼英催眠 吳得掂醒神睇股 - 李八方

狼振英噚日出席立法會答問大會時長篇大論,加埋悶到震的說話音調,不但保皇派議員頂佢唔順,連佢個「大腦」、中策組首席顧問邵善波都進入休眠狀態,開會頭半個鐘,已同行會召集人林煥光、行會成員鄭耀棠頻頻釣魚。
難得有位教育局長吳得掂開會期間鬼咁精神,原來佢猛用手機贒實股市上落,醜態俾人拍低斷正,會後即俾大批記者追問係咪睇股票。阿局長口窒窒咁話:「我唔係,我通常呢,開會之前呢,都會睇睇最新嘅news,一啲特別嘅香港嘅知識。」問到佢係咪用彭博(Bloomberg)電話App睇股票,局長話:「我都唔知,我睇咗好多唔同嘅pages。」當記者攞幅撮圖畀佢睇求證時,局長就猛話「唔係呢個」,快閃離開立法會。

唔知邊個靠害小Rubber Duck,帶佢嚟畀班官同議員抽水。馬泉崇攝

行會召集人林煥光不敵睡魔急call,趁CY廢噏時眠一眠。

吳克儉秒秒鐘都贒實股市上落,似乎用嘅係彭博App(小圖)。

發叔狼英講鴨興起

答問大會另一樣醒神嘢,就係Rubber Duck。鄉議局主席發叔話隻巨鴨來港,即為香港人帶來無限歡樂,問狼振英「有冇值得政府參考嘅地方?」狼英即自爆上周六主持策發會時,其中一位委員用咗唔少會議時間分析呢隻鴨,自言覺得呢隻鴨「好值得分析總結,學習仿效」。狼振英講到興起,仲透露狼太不惜喺屋企翻箱倒櫃,都要搵番廿幾年前仔女玩嘅膠鴨出嚟喎。