中環土地缺乏，甲級寫字樓缺乏，係人都知，前發展局長林鄭月娥老早已有計劃拆卸美利道停車場、六號碼頭停車場、林士街停車場。改建商廈連停車場，新加坡中心商業區最多呢類商廈，最低幾層做停車場，之上做寫字樓，如果話新加坡有乜嘢值得學，呢樣就最易學啦，上述三個停車場係政府物業，拿出來拍賣之時，附加興建停車場作為建造條件，舉手之勞耳，唔通又要諮詢三年？
將呢三個停車場改建為商廈，左丁山舉腳贊成，當然唔係一齊拆，而係首先拆掉最細嘅天星停車場，改建好，提供更多車位之後，就可以拆美利道停車場，最後改建林士街停車場，怕且講吓都要十年先至陸續改建完畢。過往並非無先例嘅，希爾頓酒店後面嘅停車場與希爾頓酒店一併拆掉改建為長江中心，底下咪一樣有番個停車場！
所以聽到毛孟靜議員梁家騮議員反對，都唔知佢哋講乜，中環土地資源寶貴到唔恨，淨係用來做停車場，夜晚及假日冇乜人用，嘥唔嘥啲呀，增加吓寫字樓供應、令甲級商廈租金及供應荒可以稍為緩和一下，有何不可？假如話土地拎出嚟拍賣，「明益地產商」（懶人用語），咁由政府自己起樓收租囉。拆中環街市有人反對，拆政府合署西翼有人反對，𠵱家講聲話拆中環政府停車場，又有人反對，如果左丁山係中環大地主／業主，一定笑到合不攏嘴，捐錢畀人搞反對運動都制。
灣仔熙信大廈係華懋物業，私人地方，話拆就拆，唔使諮詢三年。喜萬年呢間老招牌酒家在熙信大廈經營多年，一定要在五月底搬出，呢日飲茶聽到，喜萬年已經搵到地方，會在灣仔英皇中心復業，因裝修需時，要八月中或以後先至再同熟客見面。熙信呢棟大廈地面有一個加油站，相信會成為歷史陳跡咯，事實上，在咁多汽車／人口稠密嘅地方，有一個加油站係不適宜嘅，何況對面就係警察總部？好彩香港係高度安全地方，如果位於紐約，警察與環保部門老早要油站遷居！