吳千語與林峯打得火熱,早前林峯才公開高呼七次好愛BB,但日前千語BB卻被爆背男友偷食,更有指她與雜誌編輯Jimmy過夜而激嬲林峯,事後千語BB在微博否認緋聞。
不過前晚千語BB到跑馬地為時裝品牌行騷,她和Jimmy又巧合同場出現,Jimmy亦在台下睇騷,但他全程玩電話,到千語行騷時他才望了一眼,反而千語BB十分避忌,行騷時沒有與他有接觸,未知是否怕被傳媒拍到合照,千語BB避忌得在台上仆一仆,險些當場跌倒。事後千語死撐說因台上環境太暗,看不清楚才幾乎跌倒。
對於與Jimmy同場,千語BB強調不會尷尬,並說:「大家好friend,佢有講會嚟,不過太黑我睇唔到佢。」千語直言每日都會與林峯聯絡,互相交代工作,她說:「每日做乜嘢對方都知,佢睇完報道冇唔開心,咁無聊,而且佢知係好朋友,大家各自有另一半,唔會誤會,佢好清楚,佢明白大家有朋友,同男仔出街食飯冇問題。」
受益人不寫林峯
而千語BB昨日與化妝師Rick Chin到澳門旅遊塔為now拍攝《Chin與千尋》節目,兩人更在塔外試玩skywalk,他們事前做足安全措施,兩人更一前一後擺甫士影相,點知Rick Chin因下體束住安全帶導致下體激凸,所以合照時動作略為不雅。
原本大會指兩人會玩笨豬跳,但昨日卻臨時取消,他們否認縮沙,千語BB則直認未ready跳,男友事前亦知她會來玩。現場要他們簽下免責聲明,至於如要寫受益人時會否寫林峯?千語就說:「會寫家人,佢未係屬於屋企人圈裏面。」
採訪:何慧斯、溫敏芝
攝影:陳順禎、黃文偉
逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://hk.add.nextmedia.com睇番足本網上版,除咗有專訪外,仲有好多時裝靚嘢睇!