如果話阿里巴巴創辦人馬雲係「金句王」，港交所（388）行政總裁李小加必定係「比喻王」。李小加能言善辯，最鍾意將看似複雜嘅嘢用比喻講解，噚日佢喺網誌撰文，就用起屋以至裝修做比喻，解釋佢呢幾年點解加時、推夜期、斥巨資收購倫敦金屬交易所（LME）。但股東應該更想睇到一份亮麗成績表囉。
打晒底 要等市場機會
李小加每次見傳媒或者撰寫網誌，總會拋出好多比喻，傳媒不愁冇嘢寫。佢上任初期，最鍾意用起路做比喻，指港交所要做好準備，以備內地推行人民幣國際化，之後搞咗人民幣資金池同人民幣新股機制，但至今分別得一隻人民幣股票及一隻人民幣房託，港股直通車就未見影。
佢噚日喺網誌話，過去幾年好似「翻新鞏固一楝大房子」，首要加固根基，包括起好將軍澳數據中心同提升交易平台。收購LME、成立金磚五國交易所聯盟等，就係要搭建新平台。
今年佢就要「仔細審視房子的微結構」，有需要就「裝修」，從交易費、莊家服務、合約設計等幾方面，睇吓有冇需要修改，等港交所呢間屋「跟世界上通用的房子標準更一致。」
李小加仲打晒底，講明做咁多嘢，「在市場機會來臨時便能釋放出巨大能量」，即係叫大家等吓啦。
李華華
mailto:[email protected]