思捷（330）半年內兩度發出盈警，拖累股價噚日一度挫逾7%，小股東心血少啲都唔掂，但原來思捷最新一輯廣告一早通咗水，隱含沽貨訊號，只係大家唔察覺咋。
思捷早前推出夏季便服廣告，拍咗四條片放上網，主要係兩位靚女模特兒喺不同場景擺pose，其中一款，兩位靚女喺海邊一隻小艇上不停擺pose，此情此景，輕易被人抽水，比喻為「坐艇」，坐艇中嘅思捷股東仲應該好有同感。所以話呢，思捷一早通咗水，叫大家散水。
思捷喺林青霞老公邢李㷧坐鎮嗰陣，一直被視為基金愛股，高峯期股價曾經升逾100大元，今非昔比，噚日徘徊喺10蚊。小股東與其坐艇唔知坐幾耐，係咪應該考慮幾時跳船仲實際呢？