原本已經是女神的苟芸慧，自從獲得郭富城在熊苟大戰中開腔力撐後，人氣更加高企，但身形亦從此越來越脹。有傳無綫終於出手，勒令苟姑娘放假7日減肥，目標至少要去掉10磅肥肉，令苟姑娘再成為索爆女神！
前晚苟姑娘到跑馬地為時裝品牌行騷，暴脹不少的她雖然大晒事業線，但身形臃腫、四肢亦略嫌粗壯。經常被批評身形發福的她，直言要積極減肥，公司亦有為她接洽纖體工作，希望下月開新劇前回復最佳狀態。
熊黛林睇獸醫
談到工作不斷是否因與郭富城傳緋聞所帶挈，苟姑娘強調不關事：「要fair啲，有好多人幫手。」提到城城近日在珠海參加賽車，因炒車而無法比賽，苟姑娘表示與城城沒有聯絡。另外，《金枝慾孽貳》收視僅得19點，有傳因她硬撬熊黛林牆腳惹來網民聲言罷睇，苟姑娘否認自己拖累收視。
昨日苟姑娘則與好姊妹岑麗香於中環出席活動，合照時，她明顯被香香的纖瘦身形比下去，苟姑娘說：「我知自己好易水腫，但係都想搞好個身體先，所以想自己研究中藥方法減。」香香則指自己最近太忙，沒時間食零食才會瘦，又表示外表不是最重要，最重要是開心。對於有傳無綫下減肥令，苟姑娘昨日以電話回應說：「係我自己要求，想同公司商量吓，雖然𠵱家唔使拍劇，但係一直有工作，自己想多啲時間休息，加埋之前壓力好大，自己都想弗啲。」
另外，回復單身的熊黛林，前晚由助手陪伴在跑馬地帶兩隻愛犬睇獸醫，由於她剛剛換車身較高的Land Rover，其中一隻狗狗不夠力上車，要她用腳兜住愛犬屁股借力，狀甚搞笑。
採訪：譚倩宜、何慧斯
攝影：陳順禎、吳耀輝、李志明