佔中行動首次「商討日」下月舉行，社會已瀰漫白色恐怖，但多名公開表態支持佔中的「死士」，直指港府借無理檢控製造寒蟬效應，手法卑劣愚昧，強調無阻他們公民抗命爭普選決心。浸大社工系講師邵家臻預期，隨着「商討日」逼近，類似針對性小動作將陸續有來。中學通識教師張銳輝說：「事件反映當權者有多膽怯，咁樣只會激起千重浪，激發更多討論」！
記者：呂麗嬋 莫劍弦 馬志剛 陳凱迎
浸大社工系講師邵家臻是其中一位率先表態參與佔中的支持者，對於佔中秘書處義工陳玉峰突然被捕，邵家臻直言「憤怒多過擔心」，「只係諗可以點聲援，冇諗過自己係咪下一個被拉嘅人，講真，呢啲係下三流嘅手法，只會令全世界睇到一樣嘢：就係今時今日嘅警察，已淪為當權者嘅工具，呢個究竟仲係唔係我哋認識嘅香港？」萬分憤慨，但邵家臻強調「唔會俾自己擔心」！
遊行遭神秘人拍攝
「我哋十個人4月28日開記者會，喺剛過去嘅5.1遊行，我已發現多咗一批攞住攝錄機嘅神秘人士，拍攝我喺遊行隊伍入面嘅一舉一動，我冇查證呢啲係乜嘢人，但我相信呢啲小動作，無非係要令到參與遊行嘅人不安，製造恐慌，你越疑神疑鬼，佢哋越覺得自己做到嘢，下次就變本加厲。」
「竟然可以咁卑劣」
邵家臻表示，每年7.1都會上街，今年都不例外，「唔會因為呢件事而唔參與遊行同集會。」他笑言「如常生活」才是「致勝之道」，「我哋呢班人行得出嚟，就唔會咁易被嚇倒。最令我最激憤反而係佢哋竟然可以咁卑劣，佔中三個核心成員同我哋十個表咗態嘅支持者，佢哋唔敢搞，但就針對秘書處一個默默耕耘嘅義工，用咁閃縮嘅方法嚟示警，相當無恥。」
中學通識教師張銳輝也無懼白色恐怖，會繼續參與佔領中環。「最壞嘅想法當然係有人想製造白色恐怖，令參與嘅有所避忌，但係咁樣只係正中佢哋下懷，應該做嘅事，我一定會繼續做，自定界限就係落入咗佢哋嘅圈套」。
張銳輝相信，荒謬的無理檢控，只凸顯當權者的虛怯，反而會激起公眾對佔中行動的關注，號召更多人參與佔中，爭取真普選。
張銳輝認為，今次的事件將會引發更多討論，隨時會一石激起千重浪，令到更多人關注事件。「運用公安條例去檢控，已係對基本人權嘅侵犯，事隔兩年先提出檢控，更不尋常」。張銳輝認為有關方面應就不不尋常的檢控向公眾解釋，以釋外間疑慮。
荒謬檢控引發討論
私家醫生吳錦祥也說：「預咗呢個政府會有呢啲小動作，但唔會起到乜嘢作用。」
資深對沖基金經理錢志健也沒有擔心，反而說笑稱：「要多謝佔中核心三人組，因為佢哋嘅無私。
另一名「死士」、作家陳慧回應指：「我第一時間喺facebook分享呢段新聞，之前仲擔心商討日前佔中課題無以為繼，荒謬嘅檢控正好引發公眾討論。」
佔中死士未驚過
私家醫生吳錦祥：「預咗呢個政府會有呢啲小動作，但唔會起到咩作用。」
作家陳慧：「我第一時間喺facebook分享呢段新聞，之前仲擔心商討日前佔中課題無以為繼，荒謬嘅檢控正好引發公眾討論。」
資深對沖基金經理錢志健：「要多謝佔中核心三人組，因為佢哋嘅無私，先可以有咁大力量，令到當局咁膽怯。」
浸會大學社工系講師邵家臻：「我憤怒多過擔心，只係諗可以點樣聲援，冇諗過自己係咪下一個被拉嘅人。」
中學通識教師張銳輝：「呢啲打壓只會產生反效果，寒蟬效應變激起千重浪，激發更多討論。」
