立法會正在大打拉布戰，每日響起十多廿次嘅點人數鐘聲，短則幾分鐘，長則十五分鐘，不斷噹、噹、噹、噹，如果係禪院鐘聲洗滌心靈就話多聽無妨啫，但係召人鐘聲疲勞轟炸，就真係多謝都嚟唔切。議員可以大條道理no show避開唔聽，但立法會職員就走唔甩要硬食，如今已搞到有立法會職員出現幻聽，返到屋企仍然「噹、噹、噹、噹」。
職員冇得避最慘
立法會嘅召人鐘聲，恍如孫悟空嘅緊箍咒，一響鐘，議員要即時回朝，履行議員開會職責，否則就會流會。雖然議員尚可輪更湊夠35人就可過骨，但係立法會職員就冇得避，焗住要喺大樓聽足全程，聽到人到癲。
有立法會職員同八方講開呢件事，真係一殼眼淚，因為呢個鐘聲喺成個大樓連廁所格入面都聽到，好似輻射咁無得避，有職員已出現幻聽，感覺自己如思覺失調，有時即使個鐘明明冇響，都會問吓周遭嘅同事：「個鐘係咪響緊？」而唔少職員趁小休或食飯期間，都寧願離開大樓，等耳仔休息一下。唔知勞工處同職業安全健康局係咪都可以介入事件。
同樣被迫「聽鐘」嘅立法會主席曾鈺成就笑笑口話，返到屋企聽唔到鐘聲感覺空虛兼若有所失，可能曾鈺成都俾啲鐘聲搞到口不對心，語無倫次。立法會秘書處就話，試吓喺冇議員嘅樓層降低個鐘聲音量，減低個鐘聲嘅殺傷力。
李八方
mailto:[email protected]