自由黨近年搞Social Wednesday歡樂星期三，一大班西裝友隔幾個星期三就會雲集蘭桂坊，出席集合識女仔、換卡片、聽嘉賓演講嘅聚會，有幾專心聽嘉賓講嘢就唔知啦。聽搞手自由黨青年團召集人李梓敬講，嚟緊有位嘉賓載譽歸來，佢就係自由黨前黨友唐英年嘞。
唐唐今次再回娘家演講，最快都要5月尾先成事，萬眾期待佢品評時事。李梓敬話，今次唐唐嘅演講，最唔同嘅地方就係有酒飲，因為上次唐唐做嘉賓時，正值係考慮參選特首嘅敏感時間，加上任何選舉活動都不能向參加者提供酒精飲品，所以為免被人變成黑材料，上次全場冇酒飲。今次就唔使嘞，唐唐隨時攞埋紅酒，同大家不醉無歸。