小店結業不是新聞了，但瓊華這一單是來得有點早。瓊華開業12年，才剛夠讓中學生長成一名OL，儲夠錢買以往想買的衫──但買衫的地方快不在了。但願以下的，不是最後一代小資本小生意小故事。
記者：劉嘉蕙 攝影：黃子偉
酒樓．百貨．小店．then？
八十後跟阿爸阿媽一輩說「瓊華」，大多先想起酒樓。今瓊華中心位置，前身是瓊華酒樓，由廣州酒樓大王譚傑南於1955年開辦。昔日馬迷都愛光顧瓊華買「馬仔」（即薩琪瑪），皆因瓊華以「食完馬仔，贏馬仔」作招徠。譚傑南過世後，兒子譚炳權遵從父親心願，89年將酒樓拆卸重建為17層高商場及寫字樓，至90年代曾租予永安百貨，01年改建成瓊華中心，變成以小店為主的年輕人商場。今年二月，商場百多個商戶獲通知不再續約，預計五月底前清場。
瓊華中心日後動向，市場傳出多個版本，有消息指潮流服飾店Forever 21將借此進駐旺角，近月又傳老牌百貨先施將以600萬承租，商場負責人回應指，現階段不會作出評論。
十年前十萬開店
十年前開呢間舖時，我得十幾歲。本身我有玩Cosplay，又讀時裝設計，就同家姐夾錢開舖，另外有個工場仔自己做衫。記得那時啱啱過沙士，租金比較平，家姐話瓊華人流幾好，連舖租10萬蚊搞掂，旺角區算抵。
我賣嘅衫係Gothic Lolita，比較高貴優雅。由瓊華起家，全盛有4間舖。我見官恩娜、Kary同Cammi都有幫襯過。𠵱家得番瓊華一間，其他舖租太貴頂唔住。講起嚟瓊華業主好好人，十年只係加三四成租，我見其他商場，加親都一倍。
二月收到通知話唔續約，當時覺得好麻煩，𠵱家冷靜咗──都冇得唔冷靜。仲做唔做？一定做落去，好多客人鍾意我哋啲衫，聽到瓊華要清場，個個走嚟話幫我哋搬嘢、又搵舖頭資料畀我哋，我好感動。賣Lolita衫唔同其他生意，好多客人細個時鍾意啲衫，等到有經濟能力先可以瘋狂地買，𠵱家旺角賣呢類衫買少見少，我哋唔做，啲客會好失望。
一波未平又一波
瓊華開張我就喺度開舖，你問我呢間係咪發迹店？我都冇發迹過。細場轉租約，我試過幾次啦，一開始我喺信和創業，又係迫遷所以嚟瓊華。早幾年我喺銅鑼灣總統開舖，又收咗，𠵱家就到呢度。你見我出面貼晒紙好激動？哈，本身只係小激動，但最近，唉……我大埔間旗艦店，領匯㗎，啱啱又話要加八成租，我都幾徬徨。做精品店，利潤得兩三成，入領匯場，佢哋唔鍾意啲貨擺到密質質，隔一輪要你裝修，我已經好頭痛，𠵱家仲話加八成，八成點做到啫？以前我覺得，打工搵萬幾蚊一個月，不如開舖，點知𠵱家連搵個位都難，金舖開到西洋菜街，我估好快入到通菜街。唉，做得一日得一日先啦。
一日打三次卡
瓊華仲係酒樓嗰陣，我阿爸就喺地舖開毛冷店，講起都50年前。唔講你未必知，瓊華有個打卡制，我估係全港獨創。你知商場小店好多開好晏，瓊華唔想日頭冷清清，就黐個barcode喺每間舖門口，要大家一日打三次卡。返齊一個月，會有租金回贈。不過回贈前幾年cut咗啦，後來改做返唔齊要罰錢。我哋成日講笑話呢度家長式管理，開舖好似返工。
喺瓊華我度過好多重要時刻，記得01年開張冇幾耐就911；03年沙士個場靜到不得了，好多舖本來好哋哋，第二朝突然執清晒，要搵執達吏入去。
瓊華清場，老實講我有心理準備，只係冇諗到咁快。其實近年人流係跌咗，本身我哋仲擔心會加租，點知係講拜拜。消息一出嗰日，隔籬舖有人即刻喊晒，話啱啱先裝修完，好慘。
我知好多客好唔開心，但諗真係無可厚非，轉做一個租客一定冇咁煩，報紙寫話下手租金六百萬，𠵱家160間舖租滿都係四百幾萬，賺多啲喎，我係佢我都係咁揀啦。
