【台北】最近喺影圈六連仆嘅張栢芝，近日除咗返內地參加跳水節目搵錢之外，喺電影方面似乎無以為繼，早幾日佢就趁住呢段空檔帶埋兩個囝囝Lucas同Quintus，去咗台北同林心如、徐熙娣（小S）成班朋友敍舊。
大前日下晝一點，栢芝將兩個囝囝放喺京華城百貨公司嘅兒童遊樂區，自己同髮型師朋友會合埋林心如一齊行街買嘢，買足兩個鐘先接番兩個仔去玩具反斗城買玩具，順便買埋禮物畀嚟緊星期日（12日）3歲生日嘅細仔Quintus，其間林心如母性大發負責照顧兩位小朋友。
想再生B
到夜晚8點，張栢芝三母子同小S、Makiyo佢哋食飯，之後買飛睇喺台灣被列為保護級嘅《鐵甲奇俠3》（Iron Man 3），根據台灣法例呢類電影未滿6歲嘅兒童唔可以入場，所以佢哋冇耐就俾戲院職員請咗出戲院。據知，原來栢芝下晝已經試過買飛闖關失敗，點知佢係要衰多次。
另外，栢芝嘅好友兼化妝師Rick Chin噚日到澳門旅遊塔宣傳，對於栢芝因跳水扭傷腰舊患，Rick Chin話女人條腰好緊要，仲爆栢芝有諗過再生B，不過佢就話栢芝未有第二春，佢都好心急想栢芝快啲搵到好人家。
撰文：李森
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！