噚日推介嘅映美（2028）勁升16%，證明高息股喺旺市依然有市場，另一隻高息股永嘉（3322）調整已近尾聲，隨時破旗而上，可望多兩眼。
原本屬於高息系列、專營展覽及市場推廣生意嘅筆克（752），今年累升逾兩成，息率已降至3.3厘。睇番盤數，截至去年10月底，全年賺2.4億銀，微跌3.8%，毛利率亦收窄至28.1%，但股價竟反地心吸力，相信原因有兩個︰第一，接單頻頻。筆克早前宣佈，子公司中標上海迪士尼樂園項目，涉資逾億元人仔，另外又與意大利同業組成聯盟，為2015年米蘭世界博覽會鋪路。第二，有大戶撐場。美國基金年初披露持有筆克12%股權，連同大股東及其他基金，街貨只得三成，要炒上冇難度。
筆克昨平收2.85元，股價已橫行超過一個月，隨時再發力，彭博綜合券商預測，今年市盈率12倍，估值合理，生意不絕亦有利公司派高息，以2.60元作止蝕位進場，隨時有驚喜！
唐牛