上周六港甲和富大埔護級失敗，下季降落乙組，全體球員淚灑當場，上了體育版，當中球會大使Lulu董嘉儀更加梨花帶雨。
三年前Lulu初登場，沒有球迷能招架17歲的燦爛笑容，自此「大埔Lulu」在球圈無人不曉。作為模特兒，她跑慣江湖，深知世途險惡，難得在球場上找到溫暖，賓主關係卻可能驟然結束。生意不成仁義在，下季縱是無酬也會繼續支持球會，同舟人，當然誓相隨。 記者：陳勝藍 攝影：胡智堅
Lulu雖是模特兒，但一不行catwalk，二不是𡃁模，「𡃁模應該係着三點式呀、影寫真集呀、拍電影呀……」一句到尾，賣弄性感，「佢哋hard sell事業線，但我哋呢啲model比較健康，需要咁着先咁着。𡃁模係博出位，喺唔需要嘅場合着性感衫，可能唔係佢哋想，可能係公司要求」。8月才滿20歲，卻很會為他人設想。
除了替大埔宣傳，還拍攝平面、電視廣告，也做推廣，「最辛苦應該係promotion（推廣），夏天特別多promotion，我化晒妝，流晒大汗，個妝溶晒，但有好大班攝影師影相」。模特兒卻寧願在炎夏多賺辛苦錢，事關冷風一到，身上衣服多了，錢包也跟着步入寒冬，不如好天斬埋落雨柴，「我哋工作就係咁，搵多啲，驚遲啲淡季。冬季聖誕都ok，只係2、3月至5月麻麻哋」。
供應多20歲成老將
每月平均賺2、3萬元，一分一毫得來不易，「（這行）好處係搵錢好快，可能一日有千幾蚊、幾千蚊、幾萬蚊都有，但筆數幾時先收得番？我哋做model最驚走數。一般工作多數月頭出糧，但我哋至少三個月先出糧，仲要打電話上公司問：『有糧出未呀？』有時佢哋唔聽電話，或者話：『我要幫你再check check！』我哋係咁問係咁問係咁問，佢哋先會答」。
模特兒按年齡分工，「17至20歲笑容甜美，新面孔，多數做promotion；19至20頭，個樣比較特別啲，做print ad、tvc（平面、電視廣告）；20至25歲比較成熟，做press con（記招），可能sell電腦產品」。年過25呢？Lulu答不上，「我做model只係搵幾年青春錢，之後轉返正行，一定係25歲前」。
去年取得酒店管理及旅遊學高級文憑，但急流勇退談何容易，不少模特兒年過25依然打拼，「咁我都戥佢哋辛苦，到咁嘅年齡都出嚟做model。我諗佢哋有自己原因，可能仲爭10幾萬就買到樓，咁就出嚟做」。
她常向前輩討教，對方也樂意分享，包括一個殘酷的事實：模特兒身價大不如前。「我都戥自己辛苦，竟然揀咗呢個時候做model！」供應越多價格越低，是顛撲不破的市場定律，模特兒也不例外，「真係越嚟越多，我見到有一批細過我嘅model，我變咗係年紀大嘅model，被比下去！」
自古model如童星，不許人間見二字頭，可憐Lulu年將20已算老將，「青春當然無敵，個個客都需要新面孔，啲客覺得悶，問：『有冇第二批女仔畀我揀？呢個已經用過，雖然佢係好好，但我想試新嘢喎！』」。
拍慣廣告的人，當然懂得宣傳自己，Lulu自拍影片放上YouTube，「點都爭唔贏新嗰批，只可以想辦法幫自己build up」。他日倘有女兒，可會讓她當模特兒？「我相信之後嘅價應該仲衰過𠵱家，所以唔會叫佢做」。
江湖上人心叵測，她卻在足球場上找到安慰。三年前中五畢業，替一間公司推廣健身器材，獲公司派到和富大埔當宣傳大使，球迷教她何謂越位，閒時一起吃飯，有若家人，「我覺得呢個工作好開心，因為model工作都比較死板，都係影相，escort（陪伴）啲人，但睇波可以寓工作於娛樂，又可以嗌，可以發洩，又睇到自己鍾意嘅一班球員踢波」。
訪問在上周六聯賽生死戰期間進行，比賽末段大埔領先對手橫濱FC 2：1，Lulu不禁手舞足蹈，甚至中斷訪問，「我可能要落去影相！」誰料最後一分鐘失守，逼和2：2，宣告降班，球員的汗水換來Lulu的眼淚。她從沒為任何推廣活動淌過半滴淚，卻將球隊榮辱憂戚放在心頭，「佢哋冇得踢甲組，可能唔會再畀錢，但我一樣支持！」
賽後Lulu還有工作在身，她抹去眼淚，幹掉一罐可樂，補補粉便上路，難得仍能笑臉迎人，「無論係咪工作，我覺得點都要笑畀人睇，冇理由黑面對住人嘛！」專業模特兒就是這樣煉成的，天塌下來也要滿臉堆歡，「個客揀咗你，畀咗錢你，冇理由噚晚你同男朋友嘈交，今日就唔笑，黑口黑面工作」，這一刻，她的專業有如甲組球員。
你想爆?幫你爆
熱線電話：2990 7225
WhatsApp：9131 4511
mailto:[email protected]