聽日開始招股嘅中石化煉化（2386)，佢個上市編號都幾易記，事關呢個編號意指第二隻中石化（386），啱晒記冧巴炒股嘅股民。中石化日後再分拆業務在港上市，可以攞3386，如此類推，儲齊一個系列喎。
呢個中石化系股票編號系列，應該由董事長傅成玉喺中海油（883）帶過嚟，中海油2001年上市，中海油田服務（2883）翌年接力上市，編號咪就係意指第二隻883，可惜中海油化學（3983）2006年上市時冇攞3883，結果翌年畀中國奧園用咗。
中煉化係傅總過檔中石化後一大重要項目，賓架們都交足功課，市場傳聞，國際配售已經超購兩倍幾，恒地（012）主席李兆基同新世界發展（017）主席鄭家純都有落飛，傳係咁傳，呢啲大孖沙落飛嘅宣傳招數唔知仲有冇效就真。