台灣民間反核浪潮鋪天蓋地，總統馬英九為咗宣傳核四廠好安全，最近請咗現已變得「很危險」嘅城市大學入面嗰位校長郭位訪問台灣。郭位本身係核子專家，佢以講者身份出席總統府月會，估唔到語出驚人。
台灣壹電視噚日報道，郭位演說時大讚核能只要妥善運用，係非常安全兼有效，仲引用科學論文話，如果過去50年人類唔用核電，而係改採用煤同石油，咁全世界起碼有180萬人死亡，而台灣就會有6,000人喪生。郭位嘅言論即刻辣㷫台灣網民，有網民大鬧郭位身為台灣人，竟然講埋啲咁河蟹嘅言論。
有網民就建議台電（核四經營者），應該送兩桶核廢料畀郭位做紀念，答謝佢咁擦鞋幫手。