05年，老董腳痛下台，全城拍爛手掌，估唔到八年之後嘅今日，民望同老董一樣咁差嘅狼振英都有腰骨痛喎。狼英今日出席立法會答問大會，可能頂唔順，要坐低回應議員提問。不過所有特首以往都係企喺度答問題，狼英若果咁大支嘢要坐喺度，議員一定要求佢解釋。查實頂唔順，狼英咪唔撈好過啦，反正大家都happy。不過，八方最關注係，呢次腰骨痛係咪下台嘅先兆。
老董腳痛照企住報告
當年老董腳痛下台前，已向外界放晒風話佢腳痛。好似立法會前主席范徐麗泰曾經講過，董建華因為腳痛曾表示希望可以坐低宣讀施政報告，但范太話，呢個做法較奇怪，議員一定會問個究竟，其後老董費事煩，醫生開咗止痛藥畀佢，先可以如常企喺度宣讀報告，咁狼英唔知今日會唔會食定止痛藥先？俗語有話，好腰好腎好男人，如果係真，狼英一定唔係好男人，唔知阿狼太又點睇呢？