今日介紹福田實業（420），之前炒殼股潮炒過一轉，之後又靜番，但睇走勢似乎已靜靜起革命，慢慢爬番上嚟，又係時候要睇實。嚴格嚟講，福田之前唔算炒得好勁，睇番之前好多央企入股嘅股份，如僑福（207）、遠東環球（830）等，股價全部都較佢哋嘅入股價以倍計上升，央企中紡集團之前以每股1.25元入隻福田，如以一倍計，點都應該要見2.50元，剛好係截至去年底每股資產淨值（NAV）。
其實，市場忽略中紡集團嘅來頭，佢係國資委旗下央企，即直屬國務院，級數同招商局類似，背景遠遠凌駕於內房國企。
根據中紡網頁，中紡近年已轉型為一多元化嘅央企，最新以紡織及油料油脂兩大主業雙線發展，除於內地紡織業獨佔鰲頭外，亦壯大成內地油脂業翹楚，油脂加工能力達每日2.5萬噸。
短線目標1.38元
早前《爽報》同《蘋果》率先報道過中糧（606）醞釀由母公司注入糧油產業鏈項目，中紡旗下擁此主業，可能係中央啟動全國油脂業兼併重組嘅另一焦點，福田貴為中紡嘅香港上市旗艦，肯定受惠。
事實上，中紡集團董事長趙博雅舊年2月曾經講過，中紡已作準備，希望兩年內就能夠實現中紡主業整體上市。趙博雅舊年接受傳媒訪問時，話中紡的確曾經係一間外貿紡織企業，但不為外界熟知嘅係，中紡仲係中央直屬嘅四間糧食企業之一，喺內地大宗糧油市場中位居行業前列，喺油脂油料加工領域位居全國前三位，真係唔講唔知中紡係咁勁。因此無論從邊個角度去睇，福田中線肯定喺母公司扶持下會越做越大。
中紡入主福田後，已將原大股東壓喺第二控股地位，穩操話事權，隨時可以做嘢。走勢方面，福田自年初殼股潮炒上過1.38元高位後，調整至上月上旬嘅0.80元，經過一輪收集後，近日已爬番上1蚊樓上，反映已將大部份短炒客趕落車，應該係時候又爆上，短線先睇上次高位1.38元。
陳承龍
本欄逢周四刊登