在2002年，國美電器（493）最風光，股價高見7元；10年後，經歷大股東黃光裕入獄、管理層鬧翻、去年首次見紅蝕6億人仔，股價已殘到慘不忍睹，最低試過0.56元。就算前日發盈喜，首季料扭虧為盈，股價都只是輕輕一彈，昨日逆市回吐1%收0.84元。
前景難測 美林維持中性
又難怪大家唔捧場，國美講到明，轉盈全靠關連人士承擔電子商務四成虧損。不過，有分析員認為國美業績已經「見底」，將來命運就要睇網上業務可唔可以發光發熱。
美林提醒，小心國美競爭對手蘇寧，皆因蘇寧已正式宣戰，將由月底開始實行「線上線下同價」策略，即是同一樣產品，不論網上定係舖頭買都一樣價。
國美即將面臨一場價格戰，如果跟蘇寧行同一條路，利潤率就會受壓；如果唔跟，市佔率就可能被蘇寧搶走。美林表示，會密切留意蘇寧點推新策略，以及國美如何應戰。由於國美上半年前景難以預測，繼續維持中性評級，將目標價由1.10元輕微調低至1.02元，距離現價仲有兩成水位。
其實國美粉絲又唔使咁灰心，過去一段時間，國美都努力發憤改過自身，最近有消息傳出，國美同蘇寧爭緊虛擬營運牌照，月內就會揭盅。
如果國美成功爭贏，話唔埋到時有機會做番「蚊股」一族！
瑪姬兒