【銅鑼灣】林子祥個28歲寶貝仔林德信（Alex），喺圈中女性緣極佳，不時被影到同中、外籍女性出雙入對，近日同日模松岡李那夜蒲攬啜之餘，又偷嗒秦沛個27歲囡囡姜麗文。不過外面點玩都好，Alex都係孝順仔一名。
前日下晝差唔多六點，Alex一身潮人打扮加頭頂鮮色冷帽，同一名中年女性蹺手現身銅鑼灣。以為佢轉配熟女你就錯喇，其實嗰位女士係Alex媽咪、亦即係林子祥前妻吳正元。佢哋兩母子不知幾溫馨，蹺晒手咁行街街，睇見吳正元泛起嘅笑容就知寶貝仔𠱁得佢好開心啦。
引女fans埋身
兩母子沿住利園山一帶行咗去就近嘅I.T，唔知Alex係咪想買定禮物同媽咪預祝星期日嘅母親節，見佢哋由樓上行到落樓下，吳正元好似細路女咁好開心。喺樓上睇足30分鐘之後，佢哋再落地庫，兩母子不停試衫同褲。其間有位女fans要求同Alex合照，雖然見佢面有難色，但都交足功課合照。最後兩母子買到一袋二袋，吳正元笑到四萬咁口，真係有子萬事足。
採訪、攝影：吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！