西甲巴塞隆拿後衞丹尼爾，2011年同老婆戴娜離婚之後，就冇乜再傳出任何緋聞。正所謂：「男人三十一枝花」，日前佢30歲生日，着住條姣味十足嘅泳褲，同男性朋友走咗去海灘玩。夜晚又同一對仔女切蛋糕，充實到暈。
丹尼爾晒股巨肌
出名打扮騎呢嘅丹尼爾，2011宣佈同老婆結束3年婚姻之後，一直都係單身狀態；雖然傳過媾美國演員里安納度迪卡比奧前女友Bar Refaeli，但係最後都證實係吹水故仔一宗。周一呢位巴塞右閘30歲生日，冇出去媾女之餘，仲同朋友去咗沙灘玩。丹尼爾一身肌肉，渾身是勁，應該着咩泳褲都型到七彩。點知佢好揀唔揀，揀咗條姣到核爆嘅鮮橙色泳褲，仲不停擺啲騎呢「甫士」，又晒股巨肌，又扮出水芙蓉，認真攞命。佢將啲姣佬相放上網，仲懶係感觸咁留言話自己呢30年嘗盡人生百味，𠵱家要好好珍惜身邊嘅一切。
仔女賀壽變慈父
呢個姣佬慈父夜晚返到屋企收到一對仔女送嘅生日卡，又食生日蛋糕，3個人仲不停扮鬼臉勁開心。丹尼爾將啲相組埋一齊，上載到自己嘅instagram，好滿足咁話：「感謝上帝！今年一整年生活都好開心，仲可以收到咁有意義嘅禮物！多謝您永恆且無條件的愛！」丹尼爾雖然單身，但係有一對仔女咁有佢心，仲使咩要求咁多？
