幾年前，港燦嘲笑在強國推「一蚊雞」促銷死得，因為13億人民分分鐘食到渣都冇，但顯然港人未能夠笑到最後，上月尾稻香（573）靜雞雞腰斬呢個優惠，當初話有50萬隻雞應市，如今提早五日謝幕，是否代表「食到盡」文化襲港？
稻香當初以「一蚊雞」做噱頭，話係共度時艱，多數人只當加餸而已，近幾年網上見到有人叫了成枱雞，得幾碗飯，菜都冇碟，仲要post張單上facebook，意思係咪「仲唔食盡你」？平日俾人賺得太盡，食多幾碟心理平衡啲？過去港燦只會炫富，家陣要晒慳家，都幾悲哀。
面對工資租金食材樣樣升，加埋「一蚊雞」成本，稻香就咁清袋？咁又唔係。近年稻香除了食肆，還有自家物流中心，舊年又收購養殖場養豬同雞，搞一條龍供應，唔使俾人㩒住劏，舊年本港全年純利增一成達3億元，加埋全方位進攻，撈過界進軍日式餐飲業務，破頂後應夠力再上。
Samantha
本欄逢周三、五刊出