呢幾日從whatsapp收到十幾幅尖沙嘴海面嘅黃色大鴨圖片，都唔知點解咁多朋友對呢隻黃鴨有興趣，蘋果日報頭條就話「三十萬人追鴨」，幾嚇親人。左丁山睇隻鴨相片，睇嚟睇去都唔知有何特別之處及靚在邊一度。去追鴨？香港太多閒人啫啩？
但藝術邦都傳張相片過嚟，於是問佢：「喂，隻鴨點解有咁大吸引力？」佢話：「現代藝術品嚟㗎！」藝術品，恕怪左丁山老餅，欣賞唔到，對藝術邦講：「你一歲沖涼時，怕且阿媽有放過一隻鴨仔喺浴盆俾你玩，嗰隻鴨係唔係藝術品？香港老早有呢類小鴨塑膠產品，或者現時維港呢隻大鴨較為高科技製作啦。」
今時今日，左丁山對好多世事愈來愈唔明白，譬喻教育局話教科書整體加價3.3%，低於過去十二個月通脹，呼籲書商盡企業社會責任，克制啲，唔好加價咁多，然後消費者委員會例牌機械化咁樣發表聲明，對教科書加價表示遺憾，認為咁樣會增加家長負擔。
隔咗一日，教育局宣佈，新學年毅進文憑全日制課程學費由三萬至三萬二千元，調升至三萬一千四百元至三萬三千五百元，加幅約百分之五，呢個加幅當然高於通脹啦，教育局有冇叫自己盡吓「政府社會責任」呀？消委會有無表示遺憾呀？加學費唔通唔會增加家長負擔。原來私人企業加價就係不盡社會責任，政府加價就會合乎公眾利益！左丁山並非逢加價必反派，但政府與消委會要態度一致啲，唔好逢係私人企業加價都例必遺憾，政府加價就認為合理。左丁山甚至乎連陳德霖講經濟過熱都唔明，陳總裁話香港經濟過熱，私人消費開支大升，快過GDP增長喎，香港經濟過熱？你覺唔覺呀？熱在邊度？或者係失業率（3.5%）太低啦。市民消費開支大升嘅話，稻香駛乜推出一蚊雞，國泰駛乜推出星期二特廉機票？陳總裁近來總係先天下之憂而憂，故意唱淡，你地明唔明？
寫到呢度，收到香港太空館嘅宣傳海報，五月一日至十月三十一日上演「The Last Reef: Cities Beneath The Sea」，係一套海底珊瑚礁面積逐漸消失/縮小嘅彩色紀錄片，夠晒教育性。帶孩子追鴨嘅家長，有冇耐性帶孩子去睇下呢套紀錄片？嗱，肯去睇嘅細路，唔會輸在起跑線上！