樓市淡靜，地產代理呢排叫苦連天，中原創辦人施永青噚日喺報章撰文話：「即使公司不裁員，從業員也得另謀出路」，唔通暗示有裁員計劃？
否認打算裁員
華華即刻打電話畀施老闆問個究竟，佢否認打算裁員，只係叫地產代理馬死落地行咁話，仲預期今年第二季搵唔到邊間代理可以唔使蝕錢。
咁轉做乜工好？佢好認真咁話：「做碼頭工人囉，又話本港建築業幾好㗎，但請唔到人，可能辛苦啩。」佢指，港機工程（044）維修飛機，都話請唔到人，嗰啲半技術工人，收入唔錯㗎，有二萬零蚊，又冇咁大壓力。但轉唔轉行，係代理嘅選擇。
中原住宅部亞太區總裁陳永傑就話，中原住宅部上個月佣金收入1.7億元，只得微利，希望今個月可以做到1.2億元，平手唔使蝕。