雅士利（1230）突派特別息，刺激股價一飛沖天，早前曾大派特別息嘅映美控股（2028），股價勁升一輪後依然企硬，更值尊重。
主營打印機及稅控設備業務嘅映美，去年連特別息共派26.2仙，現價息率高達28厘，撇除特別息都有9.7厘，極具吸引力，翻查紀錄，映美05年上市以來年年派息，啱晒食息一族。手頭淨現金達2.3億銀，接近市值一半，名副其實係現金牛。映美市值僅5.2億銀，大股東持股七成，加上基金揸貨，街貨只得一成，要炒上話都冇咁易。
睇番盤數，去年盈利4,026萬人仔，按年倒退27%，下半年盈利僅較上半年跌不足半成，見底迹象明顯。國家稅務總局早前發佈《網絡發票管理辦法》徵求意見稿，明顯有意推廣網絡發票，加上內地增值稅試點改革，今年將進一步延伸至其他行業及地區，肯定對列印機及稅控設備需求有正面作用。映美昨收0.92元，PE約10倍，中線持有，財息兼收難度不大。
唐牛