由陳豪、伍詠薇、鄧萃雯等主演的無綫重頭劇《金枝慾孽貳》，自播出以來收視及口碑相當不濟，上周收視更跌至19點（約122萬觀眾），無綫惟有加強宣傳，安排劇中演員宣傳造勢，力挽收視。
「自己演出唔pass」
身為男主角的陳豪昨日在銅鑼灣接受本報專訪，與監製戚其義合作無間的他賣花讚花香，更有意將收視失敗的責任攬上身，因不少觀眾投訴劇中充斥崑曲戲份，陳豪說：「我明白觀眾，自己之前都接受唔到，接觸後先多咗份欣賞，睇返自己崑曲演出都覺唔pass。崑曲師傅都話要多啲時間上手，唔好意思影響到大家，畀多啲時間我一定做得更好同自然。」陳豪解釋劇中刻意說話陰聲細氣，是因他學大老倌要放輕聲線來養聲。
至於收視跌破廿點，陳豪覺得是個人喜好問題，與劇集質素沒有關係，他說：「我對監製同成team人有信心，佢哋有收視保證，今次有當日《天與地》嘅感覺，收視高唔代表劇好。阿戚係藝術家，向來同一般人唔同，唔似普通劇，係好有藝術成份，要好有耐性先唔會排斥，不過都希望觀眾接受，令收視有改變。」
伍姑娘行街訴苦
另外，伍姑娘前日相約好姊妹陳敏之行街傾心事，她們到銅鑼灣希慎道的I.T「濕平」，跟女售貨員十分好傾，之後轉戰銅鑼灣女人街，敏之在小攤販購買鞋墊，伍姑娘則站在一旁等候，最後兩女再行到利園，先在一樓買飲品，隨即蹺手密密傾，未知是否近日《金枝貳》收視差勁，令伍姑娘要向敏之訴苦？
採訪：王崇穎
攝影：陳慧安、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！