大家樂（341）早排高調宣佈換廣告公司，轉頭就有新廣告出街，頭炮唔係搵藝人名星，而係搵股評人胡孟青做一個午市套餐嘅代言人。青姐好識做，一提個廣告就代言人上身，一輪嘴咁話：「𠵱家喺中環邊度有茶餐廳可以30蚊包嘢飲，食到一個午餐？」仲打趣話呢個係「最低工資飯」。
微電影或「出賣」安樂窩
最低工資本月加到30蚊，大家樂度啱時間做推廣，都算有諗頭，但既然搵得青姐做代言人，廣告片劈頭就係玩佢當年做緊電視直播，見到滙控（005）跌到落33蚊，當場流淚嘅財經界經典場面，點解大家樂唔將呢個午市套餐定價33蚊呢？
若然定價33蚊，顧客去買飯仲方便啦，事關一講係「青姐飯」，就知係呢款午市套餐，迴響肯定仲大。
青姐話，年中都有唔少公司想搵佢做代言人，包括財務公司同纖體公司，「你睇我嘅身型，就知實有減肥公司搵我啦」，但佢都好有要求，唔會來者不拒，之前只係幫一個手機品牌同一隻美國護膚品牌做宣傳。
至於今次有幾多代言費？佢唔肯講實數，總之冇幾十萬元咁多。佢覺得呢個品牌唔錯，又代表到香港價值，所以先至應承做。稍後仲有一段微電影播出，講佢一日嘅生活，有機會見到佢嗰個堆滿報紙嘅安樂窩。照咁講，話唔定遲啲吸引到家居清潔公司打佢主意喎。
李華華
mailto:[email protected]