熊黛林（Lynn）噚日現身中環出席佳士得春季拍賣會，雖然佢有咳同少少發燒，但依然着黑色低胸裙晒事業線，由於要示範過億珠寶，所以佢除低咗「分」戒，問到心情如何？Lynn話：「好番啲，我唔係細路仔，可以控制到。」
分手後同舊愛郭富城仲有冇聯絡？Lynn猶豫咗一陣話：「好忙，冇時間。」城城日前喺珠海賽車不慎炒車，Lynn都有睇新聞知道，問有冇慰問城城？佢置身事外話：「咁多人都問咗。」再問佢擔唔擔心？Lynn話：「每人都擔心，任何人都要注意安全，慈善還慈善，危險性活動要小心。」
「畀人寫衰唔公平」
Lynn喺上海被發現跟同性朋友親密，佢有啲勞氣話：「朋友嚟，人哋有老公，我知有人影緊特登玩吓，女仔錫面、攬攬OK，但唔好成日話TB唔尊重人，我要反歧視，我當朋友係屋企人，唔係滾、唔係勾人老公，同女仔玩都畀人寫衰，好唔公平！」如果有報道寫城城，係咪都當佢屋企人？Lynn保持距離話：「好朋友。」對於早前城城祝福佢，Lynn禮尚往來話：「好多謝，祝福我嘅朋友都快啲搵到幸福。」問𠵱家有冇人追求？Lynn話：「呢方面遲鈍啲，𠵱家單身好自由。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://hk.add.nextmedia.com睇番足本網上版，除咗有專訪外，仲有好多時裝靚嘢睇！