向來由田北俊揸fit嘅自由黨，遲吓又有改動，以迎合黨高層嘅旨意。聽聞自由黨將會好似公民黨咁，將設立黨魁一職，首位黨魁就當然係田北俊啦。
而最新加開一個嘅副主席，相信會由近年獲個黨大力提拔嘅青年團主席李梓敬出任。
資深黨員不忿被打尖
憑一句「工人搞工運，唔好比工會介入」竄紅嘅李梓敬，極受黨主席周梁淑怡同劉健儀關顧，呢鋪傳佢升呢做副主席，當然可以為日後區議會同立法會選舉鋪路，但有喺黨多年嘅資深黨員唔抵得，覺得排隊咁耐突然俾人打尖，所以私下同八方講，如果李梓敬做副主席，實行退黨保平安。
李梓敬就話，控制唔到其他黨友點諗，選唔選副主席係言之尚早，講明即使將來要選都唔使周梁「介入」，全靠自己，總之𠵱家忙緊又一村同九西嘅地區工作。
另外呢，新民黨趙公梃早前辭去委任區議員一職，聽聞新民黨希望政府委任新民黨副主席鄭承隆做委任區議員。
但係政府都好頭痕，因為2011年已表明會取消委任制，如今因為有委任議員唔撈而要再委任，點同公眾交代都係問題。