美股破頂，港股乘勢造好，雖然差廿點先到23000水平，但足以令淡友腳仔軟。港滙轉強，亦成為大市挾上催化劑，至於轉強原因，普遍說法為多隻大型新股準備上市，令港元需求大增。唐牛覺得，港滙強勢推高大市，其實係一個良性循環︰大家覺得有熱錢湧入，風險胃納大咗，自然夠膽入市，大市支持力因此加強，繼而進一步造好。
講開新股，嚟緊兩隻新股──銀河證券及中煉化，原來都係皓天財經（1260）嘅客，難怪近日股價咁有氣勢，一舉突破下降通道。皓天主要提供財經公關服務，以及籌辦和協調國際路演，唔少中資巨企都係幫襯佢。睇番盤數，截至去年9月底止中期盈利6,874萬銀，按年僅跌7.7%，期內個市咁靜局，表現已算有交代。集團手頭現金連短期投資達4.6億銀，相當於市值逾四成，齋計中期息4.1仙，股息率都有近4厘，吸引到暈。睇估值，皓天年度化PE僅7.5倍，扣除現金後更低至4.2倍，現價點秤都值博。
唐牛