民主女神公民黨余若薇冇做議員後，一樣忙個不停，而且仲係忙於終身大事，不過係幫自己嘅寶貝女搞。Audrey有三位掌上明珠，年僅26歲嘅二女胡凱琳（Cheryl）將於下半年出嫁，爬咗29歲嘅大家姐胡凱家頭。政圈嘅人未食嫁女餅、未收帖，但就聽聞Audrey如何百分百投入搞呢頭婚事。
囡囡從事會計工作
第一次做岳母大人，Audrey可能忙到連電話都覆唔到，八方噚日call咗佢成日都搵唔到佢，所以仲未知佢嘅未來女婿係乜嘢人，婚期喺幾時等。不過政圈有傳，Audrey對自己二女嘅婚禮相當緊張，有人形容，佢所有事無論大定小都親力親為，仲緊張過做議員。以余若薇喺政圈同法律界嘅地位，相信婚禮規模一定唔會細得去邊。Chery l2009年喺英國著名大學LSE（倫敦政治經濟學院）畢業，攻讀經濟及數學，之後仲攞埋碩士學歷回港，兩年前Audrey曾透露佢喺香港從事會計工作，因為會計早出晚歸，所以多數都係同囡囡WhatsApp聯絡。
Audrey曾經形容Cheryl內向沉默，雖然如此，Cheryl係三位女兒中，唯一曾經為余若薇喺選舉時公開站台。08年公民黨嘅催票大會上，主題為「一人家，一條心，全投公民黨」，余若薇嘅丈夫胡維健醫生同埋Cheryl前來站台，搞到Audrey眼濕濕。
mailto:[email protected]