大學中港矛盾日深，港生嫌內地生搶獎學金，又喺宿舍房內晾衫；內地生不滿港生日玩夜玩，嘈住讀書。
大學教資會主席鄭維新噚日宣佈掟2,000萬畀院校申請搞學生融合計劃，院校出一蚊可得到兩蚊資助，即合共3,000萬搞大學維穩。筆錢仲可以資助大學用喺推廣香港，好似喺國際博覽會設「香港館」。不過港大、城大連環爆出向權貴獻媚醜聞，相信多多錢都救唔返聲譽。政府硬塞入教資會嘅行會成員張志剛，上月開始出席會議。鄭維新幫張志剛抬轎，話入得教資會粒粒巨星，好有學術地位。咁張志剛有乜把炮？佢只係講到「佢都有自己一定經驗」。佢入得教資會，好簡單啫，咪因為係梁粉囉，係狼英畀佢嘅政治酬庸。