來到簡炳墀於松柏塱村的大宅，門口泊了三架勞斯萊斯，「我82年已經開勞斯萊斯啦。當時邊有練馬師敢開勞斯萊斯呀？你話乜嘢都好，總之我就係有實力。」叼着大雪卡的簡Sir牙擦依舊。
當年鄧小平一句「馬照跑、舞照跳」，給想逃又逃不掉的港人派定心丸。今日確是錢照賭、馬照跑，不過馬會沒有了「Royal」光環，回歸近16年來，馬圈文化都在逐漸轉變……
記者：陳慧敏 攝影：劉永發、陳永威
練馬師簡炳墀 有食力冇歧視
要寫簡炳墀的戰績，恐防全版都不夠寫。重點點出他曾贏得五屆打吡冠軍，是奪標最多的練馬師。84年香港賽馬會成立100周年的兩場一級賽事，奪得長途及短途賽冠軍，當年每場總獎金金額高達100萬港元，比香港打吡大賽（Hong Kong Derby）還要高。87年為林百欣訓練的「飛躍舞士」，勝出當年「香港冠軍暨遮打盃 」，獲得馬王封號。翌年馬會首次舉辦國際性賽事，簡Sir再以「飛躍舞士」率先勝出。2000年他又以「歡騰」贏取千禧盃，更寸的是他當時冷眼旁觀，由徒弟葉楚航（副練馬師），與馬主上台捧盃。這一幕幕光輝前後，他又為黃楚標、梁孔德等本港富豪練馬。
可知道，6、70年代，華人要在英國人為主的賽馬世界中打出頭來，何其艱難。簡Sir早於62年在英國半工讀、學養馬基本知識。「近十多年本港練馬師很國際化，如澳洲冠軍大衛希斯、新加坡巨人愛倫，法國名牌賓康等。由我回港入行開始，已知啲鬼佬練馬師好歧視中國人，你唔夠叻佢梗係歧視你啦。嗰時我知道，做人一定要忠心。當年我跟俄羅斯的練馬師做嘢，我喺跑馬地買唔到南華早報，就跑到中環都要買畀佢。人哋清晨五點返工，我四點預先巡視馬房，檢查一切妥當再報告。」愛拼就會贏，72年簡Sir得馬會保送到英國念馬房管理學，放暑假他又自費去美國、愛爾蘭、英國、法國、日本，了解他國練馬方法，總結出英國跟愛爾蘭的練馬方法最妥當。簡Sir：「有些中國練馬師，仲畀馬食消夜！你三更半夜餵馬咪嘈住啲馬瞓覺！唔得嘅！我唔係認叻，我做事好認真，表現出專業水準。做我哋呢行最緊要得到馬主信任。唔係何來支持你買好馬？跑馬要貨如輪轉，唔得就再買隻好馬返來，事情才易辦。馬嘅情況，配搭騎師，都要由我話事，你咪同我多多意見。啲人話我牙擦，但冇權在手，我做來做乜？」
盃賽多唔值錢
「回歸前個個馬主都要面唔要錢！𠵱家？要面又要錢！」簡Sir心中馬圈最輝煌的日子，是8、90年代，一個馬季只跑四十多場馬的日子（現在變成八十多場）。那時候都是英國最傳統的盃賽，如女皇盃、沙丘園挑戰盃、打吡賽、董事盃等，每個馬房精英雲集，要贏，好難；贏了，臉上即時閃閃發光！賽馬獎金向來都是三七分賬。馬主七成，騎師、練馬師跟馬房職員各佔一成。簡Sir指：「當年啲馬主淨係想贏！林百欣幾乎將佢自己一半嘅獎金都分畀我哋，佢哋都無所謂嘅！我一次可以分到幾十萬呀！好威！」回歸後，馬會係又盃唔係又盃，連善堂都搞盃賽，啤酒、時裝品牌又話贊助幾個盃。「𠵱家但求馬主開心，整埋啲古古怪怪盃，都唔重要嘅！盃賽越多，咪越唔值錢囉。豪爽嘅馬主又少，因為賽馬已經變得平民化嘛。」
馬主豪氣、簡Sir事業起飛的80年代，想必就是簡Sir的Good Old Days了？他一頓，語調平靜下來：「我78年獲馬會發給練馬師牌，很多人看我不起，覺得鄉下仔冇料到。那個馬季，我勝出22場賽事；84年馬會成立100周年，我一口氣拿下了百周年紀念盃及百周年紀念瓶冠軍，就開始有人注意我了，唔係講笑！後來連國家地理頻道都拉大隊來訪問我！」由60年代講到90年代，由被歧視到打出天下，簡Sir依然三句唔埋兩句：「我講實力，牙咩擦呢？」努力出頭牙擦得起，爭回顏面，才最重要。
愛國做過乜？
這天發現，簡Sir家裏除了周處擺的獎牌、獎座跟歷史照片之間，還散落着他向國內各地捐建小學、醫學樓等得來的感謝牌匾，櫃子裏還有前全國政協副主席安子介頒給他的「香港各界慶祝委員會」的委任狀。簡Sir由不以為然，講到哈哈笑：「唏，我都好少提！不過叫做為國家做過吓貢獻。不過講起『愛國愛港』班儍佬儍妹，又企上枱又喊又叫，睇見笑到碌地。你愛國但你哋做過啲乜？安子介同霍英東兩個都好左，瞓晒身嗰種，但他們都沒吵鬧！」簡Sir說，這話一定要寫。
馬主呂少文 馬圈情濃
在洋人之中奮鬥，在名門大賽中奪標，臉上、口袋貼金，是練馬師的Good Old Days。馬主呂少文回味的，是當年馬主跟練馬師間濃厚的人情味。
現為澳門馬會董事的呂少文，以個人及團體名義共養過11匹馬。96年以300萬買入「豪情再勝」，轟動全港馬壇，份份馬經做頭版，可知當年一匹馬的價錢約為百多萬元。呂少文：「97年前，練馬師同馬主間關係如朋友，練馬師會於賽事前一、兩天來拜會你，跟你分析馬匹狀態，贏馬機會。現在馬多、賽事多，資訊發達，練馬師打個短訊報告就算了，若你養的不是頂級馬，佢都未必同你報告。」97那年，澳洲冠軍練馬師大衛希斯約呂少文食早餐，告訴他上一場賽事只是騎師發揮得不夠好，明天一定贏。呂少文聽了就跟着去下注，結果真的贏了千多萬元，「那時的練馬師很坦誠。」
階級象徵一馬牌
在還戴着「Royal」光環的年代，要成為馬主得被查家宅，名門世家，專業人士，如法官、律師、大醫生或他們的下一代就最合意。當年會裏僅得約百個遴選會員，不是超級富豪就是社會尖子，最少要得其中兩人給你簽入會推薦信，一般只有有生意往來的大商賈會得到推薦。入會後以年資分配購馬許可證申請，抽中了，還要付錢買馬，使費動輒百來二百萬，成為每年三百多匹入口馬的馬主之一。那些遴選會員每年還會有四個馬牌可以分給朋友，是讓你到會員專區看賽馬的入場票，「入會員席必得穿西裝打領呔，鞋子要全真皮，膠底皮鞋都唔得。」呂少文回憶。50元一枚的會員席馬牌，是上流社會的身份象徵。
96年首位華人行政總裁黃至剛上任，回歸後遇上98年起樓市股市齊跌、00年科網股爆破、 03年沙士，一浪又一浪，令投注額大幅下滑。「環境不好還扮甚麼高尚？索性開放馬會，門檻調低了，到應家柏成為行政總裁，原本從事投資行業的張之杰任馬場及客戶事務執行總監，出現了只要十萬元入會費、月費一千元的競駿會，可以集體養馬，馬會會員相對變得年輕化。」賽馬商業化，將之推廣給普羅大眾，有各種主題之夜，又推廣旅遊，拓闊國內市場。「在北京設香港賽馬會北京會所，昔日求之不得的會員席入場馬牌，今日長派長有。」今年年初三的投注額就高達15.26億元，入場觀眾達111,909人次，為78年沙田馬場啟用後最熱鬧的一天，但投注額仍不及97年煞科日，一天25.4億元令人震撼呢。
洋人玩意到街坊娛樂
香港的賽馬活動自1841年英國人在跑馬地開闢馬場開始。1884年，香港賽馬會成立，這依然是洋人的高級玩意。直至1927年在港督金文泰授意下，馬會吸納首批華人會員。71年，賽馬正式由業餘時代進入職業新紀元。73年，政府為打擊非法外圍投注，開設投注站容許場外投注，賽馬更成普羅市民的一大娛樂。