咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【牛腩篇】周日英超「默西塞德郡」打吡戰，利物浦同愛華頓悶和0:0，亦都正式宣佈拖肥糖前4機會幻滅，對於目前英超在任時間單一球隊第3長嘅愛華頓領隊莫耶斯，其實也算得上塞翁失馬，焉知非福，莫帥也了解球隊的安身納命之所。
站在管理角度，愛華頓真係冇得彈，用本地著名球評家Peter黃嘅評語，真係蔗渣價錢打出燒鵝味道，莫耶斯亦懂得低買高賣原則，「爆炸頭」費蘭尼身價已經值2,500萬鎊以上，成功轉手的話，拖肥糖又可大賺一筆；仲未計打起嘅巴尼斯、史密斯高文、巴克利，好似魯迪維爾咁待價而沽。
好多球隊都恨踢歐聯恨到發癲，莫耶斯都試過，不過一朝被蛇咬，十年怕草繩；05年愛華頓入到歐聯外圍賽，結果簽入一班球員如雲達美迪、西蒙戴維斯等，結果附加賽出局之餘，連帶季初聯賽戰績下滑，一度淪為護級份子，所以愛華頓一如以往，今季衝前4失敗，相信莫耶斯都了解勉強冇幸福嘅道理。
02年接手愛華頓，至今已11年，莫耶斯嘅CV真係一流，今季尾約滿，有傳曼聯、車路士等大會一度搵佢，特別係曼聯，莫耶斯係蘇格蘭籍，做費Sir接班人都好合情合理。但問題就係，莫耶斯領軍嘅功績，都係用慳家理念治軍，默默經營小球會，但要帶班霸，就要另一個思維，不問成本，最重要帶優秀人才去爭冠軍，始終莫耶斯充其量都只帶愛華頓入過英足盃決賽，冇冠軍在手，要更進一步就有點難度。拖肥糖現領先利物浦5分，餘下兩場聯賽多取2分，就肯定排名壓過紅軍，原來自1937年以來，愛華頓未試過連續兩季聯賽排名高過利物浦。文：牽牛