昨日談及之老友（老友Ａ）原來晚上好得閒，為咗追尋南丫四號被海泰號撞沉之原因，直情從互聯網下載二百幾頁嘅海難調查報告，吃過晚飯，花咗五小時由頭睇到尾，唔怪得可以指點左丁山，講出要害所在。老友Ａ常識非常豐富，佢話飛機在空中飛行，船隻在海上航行，每逢遇到有對頭機，對頭船，不知為何原因，也不理角度，一定（硬性規定）係各自向右轉，不准任何一方向左轉，此乃國際航行規則，凡船長、機師都知得好清楚。道理一字咁淺啫，兩隻船（飛機）面對面而至，齊齊急速右轉就可以避免碰撞，一轉右一轉左都有機會碰個正着，呢份海難報告書就清清楚楚講到（Captain Pryke專家證人）海泰號向左轉，南丫四號向右轉，於是海泰號就撞沉咗南丫四號。
老友Ａ仲教埋左丁山英文，starboard係船、機之右側、右舷，port係左側、左舷，英文on the portside解作左舷的一邊，不是「海港或港的一邊」。多謝佢指教之餘，問老友Ａ該海難報告，有何心得，佢話：「最大印象就係海事處一無是處，直情係一個rotten部門，想出糧而唔使做嘢，大可考入海事處做官，梁振英如果有吉士，應該下令運輸及房屋局局長張炳良大力整肅，係整肅呀，唔係整頓，呢個老大難部門！」
張炳良一介書生，教書就識啫，整肅海事處料無此能力，佢只係想管好房屋政策之嘛，負責運輸交通嘅副局長邱誠武亦係揸慣筆搵食嘅，議論就叻，搞好海事處？怕要從甚麼是port，甚麼是starboard學起，左丁山好同情佢兩位嘅處境！
事實上，梁先生已經滿手麻煩，因有民主派向廉署投訴佢僭建，廉署要為梁振英、湯顯明開file調查，梁自己又搵周松崗捱義氣做一個委員會主席，調查廉署應酬送禮嘅制度，唔通又開一個火頭嚟檢討調查海事處咩，真係做到人都癲，佢自己就話係特首，日日7-11心甘命抵，可憐跟住佢身邊嘅人，晚晚唔知有冇得放工！