國外品牌搵內地廠家做OEM，大家就聽得多。但近年有一樣產品係掉返轉頭，由中國品牌走出海外搵廠家生產，再拎返來貼牌銷售，呢種產品叫做奶粉。大家都明白內地家長對國產奶粉有幾大抗拒，所以內地商家近年都要轉型，改為100%向海外買入奶源，轉扮「洋奶粉」出售。其中一隻就係雅士利（1230）。
呢間公司捱過咗漫長的整合淘汰過程，近半年先叫做turnaround，但比起招股價4.2元，仲爭30%先返到上水面。雅士利舊年盈利勁升，仲大增派息99%，合共派4億元（人仔．下同）出街。點知過咗1個月，公司又突然對股東泛起感激之情，以「答謝股東」為理由，無端端大派特別息10億元，相當於公司淨現金的38%。
公司上市唔夠3年，當時集資27億元，由2010至12年期間，公司的淨現金一直都保持喺大概26至27億元左右水平。當年雅士利向市場抽水時，就說有n種發展用途，又話要加大產能又話收購，依家3年未過，就覺得有多餘錢派畀股東？大股東張利鈿和私募基金凱雷（Carlyle），連末期息一共淨袋7.2億及3.4億元。啲錢兜兜轉轉，大部份咪又係落入大股東袋。
海迪