咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
【咖喱篇】攞咗冠軍嘅曼聯就同利物浦一樣咁難捉摸，因為冇人知費格遜會出咩人，啲球員又會唔會出盡力；周日對車路士，開波前睇陣心都淡，又唔知費格遜想試啲咩？
見到呢季曼聯最重要嘅球員卡域克唔喺度，就知呢場費格遜唔志在㗎嘞，但佢嗰陣確實有啲兩頭唔到岸。如果想畀主力唞，點解又出尹佩斯呢？尹佩斯今季真係踢足咁濟，其實神射手佢都拎咗9成啦，點解費格遜硬係要搵佢打正選，真係好擔心尹佩斯一季就用殘。查維亞靴南迪斯同韋碧克值得有更多機會表現自己；仲記得肯定封王後，費格遜話會畀多啲機會佢哋，但事實係完全冇！費格遜呃我唔緊要，但希望唔好呃啲年青球員。
中場可以話亂石投林！如果出路爾斯華倫西亞，就應該用史高斯或卡域克，因為華西係個需要人放長傳俾佢跑嘅球員，搵佢打陣地戰就棧踢少個；牽牛兄喺周日睇波嗰陣，都唔知恥笑過華西幾多次。傑斯、湯卡華利同路爾斯安達臣雖然塞晒喺中間，但冇人肯跑前啲支援尹佩斯，搞到後者孤立無援。菲爾鍾斯一而再咁打防中，睇得出費格遜屬意佢打呢個位置，但暫時睇佢嘅表現仲未合格。如果有卡域克傍住佢都仲好啲，得佢一個就真係唔可靠，因為佢太過勇，位置感又麻麻。同好多曼聯球迷一樣，小弟希望費格遜用多啲香川真司同拿尼，睇得出佢兩個天賦係有，但需要落場機會鍛鍊自己。
每支球隊冇可能全季踢得好，狀態一定有上有落，今季費Sir刻意調校隊波季初上力；季初場場反勝唔係好彩咁簡單，而係全隊都「弗」。自從輸咗畀皇家馬德里後，曼聯道氣一窒，表現開始滑落，對強隊冇場贏得到。文：咖喱