舊年底，當特區（某幾隻無能公司嘅牌子）嬰兒奶粉荒差不多爆時，孫柏文寫咗篇講我如何睇呢行。
當日我就推介咗雅士利國際（1230）畀大家，而佢嗰日開市賣2.22元。今日講佢係因除咗股價升差不多四成外，佢哋仲要宣佈派特別股息，令佢哋有15厘股息。
呢個重要嘅地方，係以前19世紀花旗國同𠵱家嘅大陸一樣，嗰啲私人擁有嘅公司，上市後，大部份盤數有問題，甚至全間公司係一大騙局。當時，花旗國股民連乜市盈率都唔睇，淨係睇派息去決定堅定流，如果用同一邏輯，雅士利算係有呢個優勢。
市盈率唔夠十倍
講開奶粉，今日我想講一隻呢十年來每年生意越做越大，營業額十年內升超過4倍，盈利升12倍，做啲托乳房Brassiere嘅公司。
我fan屎睇咗上星期四「金手指」，都知我有預告話會講呢隻。而今日我不但講，仲要建議大家「一注獨贏安莉芳（1388）」！
佢喺火熱嘅07年上市，當時用三個幾上，經過六年嘅風雨，股價先喺上禮拜三升到4.35元一股，佢仲要喺上市後飆到七蚊！
其實，佢股價雖然六年前招股至今先升得大約五成，但由招股書裏最後一份全年業績，佢營業額同盈利就至2012年全年分別升3.6倍同4倍。
即係佢用天價市盈率上市，之後股價試過升兩次，不過對上兩年就基本上橫行，有如股價等盈利追番去合理嘅市盈率。到今日，佢冇10倍市盈率，金融海嘯後年年盈利同營業額都升成幾至兩成幾。大陸市場主導，女民工多錢就會買啲靚靚內衣褲，業績一路交到功課，香港人做老闆唔似裏面啲民企，仲唔一注獨贏安莉芳？目標價12個月睇五年高位8元一股。九倍幾市盈率，大減價呀！
孫柏文
獨立股評人
http://facebook.com/shuen
本欄逢周二、四刊出